மாட்டிறைச்சி விவகாரம் : பசு பாதுகாவலர்களால் கொடூரமாக தாக்கப்பட்ட 3 முஸ்லீம்கள்..!!

share on:
Classic

மாட்டிறைச்சி கொண்டு செல்வதாக எழுந்த சந்தேகத்தின் பேரில்  முஸ்லீம் இளைஞர்களை சரமாரியாக தாக்கிய சம்பவம் அதிர்ச்சியை ஏற்படுத்தியுள்ளது. 

மத்தியப்பிரதேசம் மாநிலம் சியோனியில் ஆட்டோவில் செல்லும் 1 பெண் உட்பட 2 முஸ்லீம் இளைஞர்கள் மாட்டிறைச்சி கொண்டு செல்வதாக வதந்தி கிளம்பியது. இதனையடுத்து பசு பாதுகாவலர்கள் என்று கூறப்படும் சிலர், அவர்களை மரத்தில் கட்டி வைத்து அடிக்கும் வீடியோ சமூக வலைதளங்களில் பரவி வருகிறது. அந்த வீடியோவில், ஓவ்வொருவராக மரத்தில் கட்டி, பிரம்பால் இரக்கமின்றி அடிக்கின்றனர். மேலும் அவர்களை “ஜெய் ஸ்ரீராம்” என்ற ஸ்லோகனை கூற வலியுறுத்தியும் தாக்கியுள்ளனர். இதுதொடர்பாக வழக்குப்பதிவு செய்துள்ள போலீசார் 5 பேரை கைது செய்துள்ளனர். இந்த சம்பவத்தில் தொடர்புடைய மேலும் சிலரை தேடி வருவதாகவும் மேலும் பலர் சிக்குவர் எனவும் காவல்துறையினர் தெரிவித்தனர். 

இந்த கொடூர சம்பவத்திற்கு அரசியல் தலைவர்கள் கண்டனம் தெரிவித்துள்ளனர். ஏ.ஐ.எம்.ஐ.எம்-ன் தலைவர் அசாதுதின் ஓவைசி தனது டிவிட்டர் பக்கத்தில் “ மோடியின் வாக்காளார்களால் உருவாக்கப்பட்ட பசு பாதுகாவலர்கள் இப்படி தான் முஸ்லீம்களை நடத்துகின்றனர். புதிய இந்தியாவை வரவேற்கிறேன்” என்று கண்டனத்தை பதிவு செய்துள்ளார்.

இதேபோல் ஜம்மு காஷ்மீர் முன்னாள் முதலமைச்சர் மெஹபூபா முஃப்தி தனது டிவிட்டரில் “ மத்தியப்பிரதேசத்தில் உள்ள அப்பாவி முஸ்லீம்களுக்கு தண்டனை அளிப்பதாக கூறி பசுபாதுகாவலர்கள் தாக்கும் வீடியோ பார்ப்பதற்கு அதிர்ச்சியளிக்கிறது. அம்மாநில முதலமைச்சர் கமல்நாத் அவர்களுக்கு எதிராக உடனடி நடவடிக்கை எடுப்பார் என்று நம்புகிறேன்” என்று பதிவிட்டுள்ளார். 

News Counter: 
100
Loading...

Ramya