உலக கோப்பை கிரிக்கெட் : பலம்வாய்ந்த அணிகளுக்கு டஃப் கொடுக்கவுள்ள வங்கதேசம்..!

share on:
Classic

ஐசிசி தரவரிசையில் 7-ம் இடத்தில் உள்ள வங்கதேச அணி உலகக்கோப்பை தொடரில் மொர்தாசா தலைமையில் களமிறங்க உள்ளது. வங்கதேச அணி கடந்து வந்த பாதை குறித்து விளக்குகிறது இந்த செய்தித்தொகுப்பு...

ஒரு காலத்தில் பூனையாக கருதப்பட்ட வங்கதேச கிரிக்கெட் அணி தற்போது பாயும் புலியாக உருவெடுத்து நிற்கிறது. இந்தியா பாகிஸ்தான் மோதும் ஆட்டங்களில் எந்த அளவுக்கு பரபரப்பு தென்படுமோ, அதேபோன்ற பரபரப்பை ரசிகர்களிடையே சமீப கால அதிரடி ஆட்டங்கள் மூலம் தொற்ற வைத்திருக்கிறது வங்கதேசம்..

கடந்த 17-ஆம் தேதி நடைபெற்று முடிந்த முத்தரப்பு போட்டியில் எதிரணிகளை மிரள வைத்துள்ளது வங்கதேசம். வெஸ்ட் இந்தீஸ் மற்றும் ஸ்காட்லாந்து அணிகளை வீழ்த்தி கோப்பையை தனதாக்கியிருக்கிறது. இந்த தொடரில் வங்கதேசம் ஒரு போட்டியில் கூட தோல்வியை தழுவாதது குறிப்பிடத்தக்கது

கடந்த ஆண்டு இலங்கையில் நடைபெற்ற நிடாஸ் கோப்பைக்கான முத்தரப்புத் தொடரை கிரிக்கெட் ரசிகர்கள் மறந்திருக்க முடியாது. இலங்கையை பந்தாடி இந்தியாவுடன் இறுதிப்போட்டியில் பலப்பரீட்சை நடத்தியது வங்கதேச அணி. 20 ஓவர்களுக்கு 166 ரன்களை குவித்து இந்தியாவுக்கு வலுவான இலக்கை நிர்ணயித்தது வங்கதேசம். அந்த போட்டியில் இந்தியாவால் போராடியே கோப்பையை வெல்ல முடிந்தது.

இதே போல் ஆசியக் கோப்பை கிரிக்கெட் தொடரில் பலம் வாய்ந்த பாகிஸ்தான், இலங்கை அணிகளை வீழ்த்தி இறுதிப்போட்டியில் இந்தியாவை எதிர்கொண்டது. அந்த ஆட்டத்திலும் இந்திய அணி கடைசி பந்தில் போராடி வெற்றிபெற்றது. என்னதான் எதிரணிகள் வெற்றிபெற்றாலும் விடா முயற்சியுடன் இறுதி வரை மிகுந்த நெருக்கடி அளிப்பதில் வங்கதேச அணி கில்லாடி...

எதிர்வரும் உலகக்கோப்பை கிரிக்கெட் தொடரில் வங்கதேசத்தை மிக எளிதாக கருதிவிட முடியாது என்றார் இந்திய முன்னாள் சுழற்பந்துவீச்சாளர் அனில் கும்ப்ளே. மஷ்ரஃபே மொர்தாசா தலைமையில் களமிறங்கும் 15 பேர் கொண்ட வங்கதேச அணி ஐ.சி.சி தரவரிசையில் ஏழாம் இடத்தில் உள்ளது. ஷாகிப் அல் ஹாசன், முஸ்தஃபிசூர் ரஹ்மான், முஸ்ஃபிகுர் ரஹீம். லிட்டன் தாஸ் ரூபல் ஹூசைன் என அனுபவ வீரர்கள் புடை சூழ களமிறங்க காத்திருக்கிறது வங்கதேச புலிகள்.. பலம்வாய்ந்த அணிகளுக்கு கோப்பையை வெல்ல தடைக்கல்லாக நிற்குமா வங்கதேசம்..? பொருத்திருந்து பார்க்கலாம்..

News Counter: 
100
Loading...

Ragavan